តើប្រជាជនហ្វីលីពីន នឹងជ្រើសបេក្ខជនណា ជាប្រធានាធិបតីថ្មីសម្រាប់រយៈពេល ៦ ឆ្នាំខាងមុខ?
ហ្វីលីពីន នឹងរៀបចំដំណើរការជ្រើសរើសប្រធានាធិបតីថ្មីនៅថ្ងៃទី ៩ ឧសភា ខាងមុខ ដោយមានបេក្ខជននាំមុខ ៤ រូប រួមទាំង កូនប្រុសច្បងរបស់អតីតមេដឹកនាំផ្តាច់ការផងដែរ។
ជាទូទៅ ប្រទេសនេះ នឹងរៀបចំការបោះឆ្នោតប្រធានាធិបតី ដោយផ្ទាល់រៀងរាល់ ៦ ឆ្នាំម្តង ដោយរដ្ឋធម្មនុញ្ញបានកំណត់រយៈពេលប្រធានាធិបតីត្រឹមមួយអាណត្តិប៉ុណ្ណោះ។ ដូច្នេះ លោក Rodrigo Duterte ដែលកាន់អំណាចសព្វថ្ងៃ មិនអាចឈរឈ្មោះម្តងទៀតបានទេ ទោះបីជាគាត់ មានប្រជាប្រិយភាពខ្លាំងក៏ដោយ។ ប្រជាជនហ្វីលីពីននឹងជ្រើសរើសប្រធានាធិបតីបន្ទាប់របស់ពួកគេពីក្នុងចំណោមអ្នកស្នងតំណែងដ៏មានសក្តានុពលចំនួន ១០ រូប។
ការស្ទង់មតិដោយស្ថាប័ន Pulse Asia Research កាលពីខែ មីនា បានធ្វើឱ្យអតីតព្រឹទ្ធសភា Marcos ដែលឈរនៅលើកំពូល ដោយមានសម្លេងគាំទ្រ ៥៦%។ ក្នុងចំណោមបេក្ខជនសំខាន់ៗផ្សេងទៀត អនុប្រធានាធិបតី Leni Robredo ជាប់លេខ ២ (មានសម្លេងគាំទ្រ ២៤%) ខណៈអភិបាលក្រុងមានីល Isko Moreno ស្ថិតក្នុងចំណាត់ថ្នាក់លេខ ៣ (មានសម្លេងគាំទ្រ ៨%) និងអតីតអ្នកប្រដាល់អាជីព Sen. Manny Pacquiao ទទួលបាន ៦% ។
យ៉ាងណាមិញ ខាងក្រោមនេះ គឺជាសមាសភាពរបស់បេក្ខជននីមួយៗ។
លោក Bongbong Marcos ជាកូនប្រុសរបស់អតីតប្រធានាធិបតី ហើយក៏មានកេរ្តិ៍ឈ្មោះល្បីល្បាញ និងបទពិសោធន៍នយោបាយគួរសមដែរ។ លោក បានបម្រើការទាំងក្នុងសភាជាន់ខ្ពស់ និងជាន់ទាបនៃសភាហ្វីលីពីន។ លោក ក៏មានប្រជាប្រិយភាពក្នុងប្រព័ន្ធផ្សព្វផ្សាយសង្គមខ្លាំងដែរ ដោយមានអ្នកតាមដានហ្វេសប៊ុកសរុបប្រហែល ៥,៨ លាននាក់ផងដែរ។
ប្រទេសហ្វីលីពីន ជាប្រទេសមានអ្នកបោះឆ្នោតវ័យក្មេងមួយចំណែកធំ មិនធ្លាប់បានឆ្លងកាត់បទពិសោធន៍រំលោភសិទ្ធិមនុស្សដឹកនាំក្រោមអណ្ណត្តិឪពុករបស់លោក Bongbong ឬ រឹតតែ មិនចាំពីបដិវត្តអំណាចប្រជាជនក្នុងឆ្នាំ ១៩៨ ដែលធ្លាប់ទម្លាក់គាត់កាលនោះ។ ដូច្នេះ ការឃោសនារបស់លោក Bongbong ក្នុងការកសាងសេដ្ឋកិច្ចហ្វីលីពីនឡើងវិញ និងអំពាវនាវដល់អ្នកគាំទ្រយុវជនរបស់គាត់នៅលើហ្វេសប៊ុកហាក់មានប្រសិទ្ធិភាព។
ចំណែកលោកស្រី Robredo បានតស៊ូជាមួយការលុបបំបាត់ភាពក្រីក្រនៅក្នុងប្រទេសហ្វីលីពីន និងទប់ស្កាត់ការរីករាលដាលនៃកូវីដ-១៩។ បន្ថែមពីនេះ លោកស្រី បានប្រឈមមុខនឹងប្រធានាធិបតីបច្ចុប្បន្ន ដែលបានគ្រប់គ្រងប្រទេសបែបរបៀបធ្ងន់ៗ ដោយជំហាននេះធ្វើឱ្យសាស្ត្រាចារ្យ និងសេដ្ឋវិទូជាង ២៧០ នាក់នៅសាកលវិទ្យាល័យ ដែលមិនពេញចិត្តនឹងរដ្ឋបាលសព្វថ្ងៃ ងាកមករកការគាំទ្រជាសាធារណៈលើលោកស្រី Robredo វិញ។
ដោយឡែក លោក Moreno ជាអភិបាលក្រុងហ្វីលីពីន បានធ្វើការលើកកម្ពស់អនាម័យសាធារណៈ និងលំនៅឋាន និងដើម្បីលម្អទីក្រុងជាបន្តបន្ទាប់។ លោក Moreno បានសន្យាថា ប្រសិនបើលោកជាប់ឆ្នោតជាប្រធានាធិបតី លោកនឹងពង្រឹងសេវាកម្មសង្គម និងហេដ្ឋារចនាសម្ព័ន្ធរបស់ប្រទេស និងជំរុញការអភិវឌ្ឍន៍ទីក្រុងក្នុងតំបន់។
ចុងក្រោយ អតីតអ្នកប្រដាល់ជើងខ្លាំងលោក Pacquiao ក៏ស្ថិតក្នុងចំណោមបេក្ខភាពកំពូលទាំង ៤ ផងដែរ។ លោក បានចូលនិវត្តន៍ពីសង្វៀន ដើម្បីឈរឈ្មោះជាប្រធានាធិបតី ដោយសន្យាថានឹងលុបបំបាត់អំពើពុករលួយរបស់រដ្ឋាភិបាលផងដែរ។
ទោះយ៉ាងណា ចិនហាក់ដូចរួមចំណែកធំគួរសមលើការបោះឆ្នោត។ ទោះបីជា ហ្វីលីពីនមានសម្ព័ន្ធភាពយូរអង្វែងជាមួយសហរដ្ឋអាមេរិកក៏ដោយ ក៏លោក Duterte បានរក្សាគម្លាតពីប្រទេសនេះ ហើយបែរទៅរកទំនាក់ទំនងជាមួយប្រទេសចិនវិញ។ បើទោះបីជា ទីក្រុងប៉េកាំង និងទីក្រុងម៉ានីល មានជម្លោះទឹកដី លើកោះនៅសមុទ្រចិនខាងត្បូងក៏ដោយ ក៏ទំនាក់ទំនងពាណិជ្ជកម្មប្រទេសនេះនៅតែស្អិតរមួតដដែល។
ដូច្នេះ ជំហររបស់ប្រធានាធិបតីបន្ទាប់នៃប្រទេសនេះ ថាតើនៅតែរក្សាចំហរចំពោះចិនឬយ៉ាងណា នឹងធ្វើឱ្យប៉ះពាល់យ៉ាងខ្លាំងដល់សន្តិសុខក្នុងតំបន់។
សំណួរមួយទៀតគឺថា តើប្រធានាធិបតីបន្ទាប់នឹងបន្តគោលនយោបាយរបស់លោក Duterte ដែរឬទេ? ខណៈពេល ដែលគោលនយោបាយលោក Bongbong ត្រូវបានចាត់ទុកថាមានភាពប្រកៀកប្រកើយ នឹងបន្ទាត់គោលនយោបាយរបស់លោក Duterte។ ផ្ទុយទៅវិញ គោលនយោបាយរបស់លោក Robredo និង Pacquiao ហាក់ផ្ទុយជាមួយប្រធានាធិបតីវិញជុំវិញបញ្ហាប្រទេសចិន។ ជាទូទៅ លោក Duterte មិន គាំទ្របេក្ខជនបែបនេះឡើយ។
ប្រភព៖ Nikkie Asia
