តួកគីព្រមានកិ្រកពីការធ្វើសកម្មភាពយោធានៅតាមកោះនានានៅភាគខាងកើតសមុទ្រ Aegean ដោយថា «ក្រិកនឹងមានវិប្បសារី»
ប្រធានាធិបតីតួកគី ដែលជាប្រទេសនៅតំបន់មជ្ឈឹមបូព៌ាមានព្រំដែនជាប់ប្រទេសក្រិក បានព្រមាន ប្រទេសក្រិកកុំឱ្យបន្តការធ្វើសកម្មភាពយោធានានាលើកោះក្នុងសមុទ្រ Aegean បើមិនដូច្នេះទេ «ពួកគេនឹងជួបវិប្បដិសារី» ខណៈដែលប្រមុខរដ្ឋក្រិកអំពាវនាវឲ្យប្រជាជនខ្លួនសាមគ្គីគ្នា។
បណ្តាញសារព័ត៌មាន Middle East Monitor លោក រ៉េសិប តៃយីប អេរដូហ្គែន(Recep Tayyip Erdogan) នៅក្នុងសារបង្ហោះនៅលើបណ្តាញសង្គមធ្វីតធ័រជាបន្តបន្ទាប់ ជា ភាសាក្រិក ដែលមានខ្លឹមសារថា៖«ជាថ្មីម្តងទៀត យើងព្រមាន ក្រិក ឱ្យមានការប្រុងប្រយ័ត្ន ឱ្យនៅឱ្យឆ្ងាយពីក្តីសុបិន វោហាសាស្ត្រ និងសកម្មភាពដែលនឹងនាំវាទៅរកលទ្ធផលដែលនឹង«សោកស្តាយ» ដូចដែលបានកើតឡើងកាលពីមួយសតវត្សមុន»។ នេះបើយោងតាមបណ្តាញសារព័ត៌មាន Middle East Monitor។
ទីភ្នាក់ងារព័ត៌មានរបស់ប្រទេសតួកគី aa.com បានផ្សាយកាលពីចុងខែឧសភាថា ដោយចោទប្រកាន់ក្រិចថា បន្តធ្វើសកម្មភាពយោធានៅតាមបណ្តាលកោះនានានៅភាគខាងកើតសមុទ្រ Aegean ដែលរំលោភទាំងសន្ធិសញ្ញា Lausanne នៃប្រទេសស្វីសឆ្នាំ១៩២៣ និងសន្ធិសញ្ញាទីក្រុងប៉ារីសឆ្នាំ១៩៤៧។
លទ្ធផលប្រកបដោយវិប្បដិសារី ដែលប្រធានាធិតីរូបនេះបានលើកឡើងសំដៅលើជ័យជំនះរបស់ប្រទេសតួកគី លើការឈ្លានពានទឹកដីរបស់ខ្លួនដោយក្រិក និងសម្ព័ន្ធមិត្តអ្នកកចក្រពត្តិនិយមលោកខាងលិចរបស់ពួកគេ បន្ទាប់ពីការដួលរលំនៃចក្រភពអូតូម៉ង់បន្ទាប់ពីសង្គ្រាមលោកលើកទីមួយ។
លោក អេរដូហ្គែន បានរិះគន់ការប្រើប្រាស់នៃសហភាពអឺរ៉ុប (EU) និងសម្ព័ន្ធភាពណាតូ របស់ទីក្រុងអាថែន ដែលក្រោយមកទីក្រុងអង់ការ៉ាបានក្លាយជាសមាជិករបស់អង្គការយោធា ណាតូដែរ ក្នុងការគាំទ្រក្រិកនៅក្នុងជម្លោះក្នុងតំបន់របស់ពួកគេ ដោយនិយាយថា រដ្ឋាភិបាលក្រិកគួរតែចរចាបញ្ហាទាំងឡាយជាទ្វេភាគី។
លោកបាននិយាយថា៖«ការប៉ុនប៉ងប្រើប្រាស់ណាតូធ្វើជាឧបករណ៍និងប្រទេសទីបីដែលនាំឲ្យពួកគេជាប់ពាក់ព័ន្ធនៅក្នុងភាពខុសច្បាប់នៃសមយុទ្ធយោធាផ្សេងៗនៅលើកោះដោយលក្ខខណ្ឌគ្មានយោធា គឺគ្រាន់តែជាការប៉ុនប៉ងដែលនឹងបញ្ចប់ប្រកបដោយមហន្តរាយ» ។
លោក អេរដូហ្គែន ក៏បានចោទប្រកាន់រដ្ឋាភិបាលក្រិកពីបទរំលោភលើតម្លៃ និងច្បាប់របស់សហភាពអឺរ៉ុប ដោយធ្វើទុក្ខបុកម្នេញលើជនមូស្លីមរបស់ខ្លួន ដោយបញ្ជាក់ថា «ទោះបីជាជាសមាជិកនៃសហភាពអឺរ៉ុបក៏ដោយ [ក្រិក] នៅតែបន្តគៀបសង្កត់ជនជាតិភាគតិចតួកគី ដែលរស់នៅក្នុងកោះ Western Thrace, Rhodes និង Kos ដោយមិនអើពើនឹងតម្លៃនៃ សហភាព សិទ្ធិមនុស្សទូទាំងពិភពលោក និងកិច្ចព្រមព្រៀងអន្តរជាតិ»។
ប្រឈមការព្រមាននេះ នាយករដ្ឋមន្ត្រីក្រិក លោក Kyriakos Mitsotakis បន្ទាប់មកបានអំពាវនាវឱ្យមានឯកភាពជាតិឆ្ពោះទៅរកអ្នកជិតខាង «ដែលមិនអាចទាយទុកជាមុនបាន» ដោយនិយាយអំពីលោក អេរដូហ្គែន ថា «គាត់កាន់តែឯកោ គាត់កាន់តែខឹង»។ យោងតាម Middle East Monitor។
រហូតមកដល់ពេលនេះ ក្រុងអាថែនបានបដិសេធមិនព្រមធ្វើឲ្យគ្មានយោធាលើកោះនានាក្នុងសមុទ្រ Aegean ដោយទទូចថាខ្លួនកំពុងការពារផលប្រយោជន៍សន្តិសុខជាតិរបស់ខ្លួន។ ទោះជាយ៉ាងនេះក្តី ទីក្រុងអង់ការ៉ា បានលើកឡើងពីសន្ធិសញ្ញា និងច្បាប់អន្តរជាតិ ក្នុងកិច្ចខិតខំប្រឹងប្រែងដើម្បីបង្ហាញថា ទង្វើរបស់ក្រិក គឺជាការគំរាមកំហែងដោយផ្ទាល់ដល់សន្តិសុខជាតិរបស់ខ្លួន៕
