បៃដិន៖ អាមេរិកនឹងបញ្ជូនជំនួយយោធាចំនួន ១ ប៊ីលានដុល្លារបន្ថែមទៀតដល់អ៊ុយក្រែន
ប្រធានាធិបតីសហរដ្ឋអាមេរិកលោក ចូ បៃដិន ប្រកាសនូវជំនួយយោធាថ្មីដល់អ៊ុយក្រែនក្នុងតម្លៃ ១ ប៊ីលានដុល្លារបន្ថែមទៀត ដែលរួមបញ្ចូលទាំងប្រព័ន្ធប្រឆាំងរថក្រោះ គ្រាប់រ៉ុក្កែតកាំភ្លើងធំ និងគ្រាប់កាំភ្លើងធំផ្លោង Howitzer។
លោក បៃដិន និយាយថា៖ «ខ្ញុំបាននិយាយជាមួយប្រធានាធិបតី [អ៊ុយក្រែន លោក វ៉ូឡូឌីមៀ] ហ្សេឡេនស្គី ដើម្បីពិភាក្សាអំពីសង្រ្គាមដ៏ឃោរឃៅរបស់រុស្ស៊ីនៅអ៊ុយក្រែនដែលកំពុងបន្ត។ ខ្ញុំសូមអះអាងជាថ្មីនូវការប្តេជ្ញាចិត្តរបស់ខ្ញុំថា សហរដ្ឋអាមេរិកនឹងឈរក្បែរអ៊ុយក្រែន ដែលការពារលទ្ធិប្រជាធិបតេយ្យ និងគាំទ្រអធិបតេយ្យភាព និងបូរណភាពទឹកដីរបស់ខ្លួន ដោយប្រឈមមុខនឹងការឈ្លានពានរបស់រុស្សីដោយមិនញញើត»។
សេតវិមាននិយាយថា ការថ្លែងរបស់លោក បៃដិន ធ្វើឡើងក្រោយកិច្ចសន្ទនាជាមួយលោក ហ្សេឡេនស្គី ទាក់ទងនឹងកញ្ចប់ជំនួយចុងក្រោយទី១២ តាំងតែសង្រ្គាមផ្ទុះឡើង ខណៈរដ្ឋមន្ត្រីការពារជាតិលោក ឡយដ៍ អូស្ទីន (Lloyd Austin) កំពុងជួបជាមួយសម្ព័ន្ធមិត្តនៅអង្គការណាតូ។
លោក អូស្ទីន ប្រាប់បណ្ដារដ្ឋមន្ត្រីការពារជាតិនៅណាតូថា៖ «យើងកំពុងធ្វើការនៅក្នុងការបំពេញតាមសំណើអ៊ុយក្រែនចំពោះអាវុធថ្មី ជាពិសេសតម្រូវការរបស់ប្រទេសនេះលើអាវុធបាញ់រយៈចម្ងាយឆ្ងាយ ពាសដែក និងប្រព័ន្ធការពារនៅឆ្នេរសមុទ្រ»។
លោកបន្ថែមថា៖ «យើងនឹងផ្តល់ឱ្យអ្នកការពារអ៊ុយក្រែននូវប្រព័ន្ធបាញ់រ៉ុក្កែតទំនើបរយៈចម្ងាយឆ្ងាយ HIMARS និងប្រព័ន្ធរ៉ុក្កែតបាញ់ច្រើនគ្រាប់ ហើយអាវុធទាំងអស់នេះនឹងជំរុញយ៉ាងខ្លាំងនូវសមត្ថភាពរបស់អ៊ុយក្រែន»។
ទន្ទឹមនឹងជំនួយយោធាថ្មី លោក បៃដិន ក៏ប្រកាសផ្តល់ជំនួយមនុស្សធម៌បន្ថែមចំនួន ២២៥ លានដុល្លារសម្រាប់អ៊ុយក្រែនផងដែរ ដើម្បីដោះស្រាយតម្រូវការដូចជា ទឹកស្អាត ការផ្គត់ផ្គង់ផ្នែកវេជ្ជសាស្រ្តសំខាន់ៗ អាហារ និងសាច់ប្រាក់សម្រាប់គ្រួសារដើម្បីទិញរបស់របរសំខាន់ៗ។
កញ្ចប់ជំនួយនេះ ប្រកាសឡើងខណៈដែលភាពតានតឹងនៃការប្រយុទ្ធគ្នាកំពុងបន្តនៅតំបន់ដុនបាស។ ខណៈរុស្ស៊ីចោទលោកខាងលិច រួមទាំងសហរដ្ឋអាមេរិក ពីការចាក់សាំងលើភ្លើងដោយបញ្ជូនអាវុធទៅឱ្យក្រុងកៀវ អនុរដ្ឋមន្ត្រីការពារជាតិអ៊ុយក្រែននិយាយកាលពីថ្ងៃអង្គារថា អ៊ុយក្រែនបានទទួលសព្វាវុធត្រឹមតែ ១០ ភាគរយនៃចំនួនដែលខ្លួនស្នើរសុំពីលោកខាងលិចប៉ុណ្ណោះ។
កន្លងមក លោក ហ្សេឡេនស្គី បានរិះគន់ពីអាកប្បកិរិយារារាំង បង្អាក់ឱ្យការបញ្ជូនអាវុធមានការយឺតយ៉ាវពីមេដឹកនាំលោកខាងលិចមួយចំនួន ហើយនិយាយថា៖ «ខ្ញុំដឹងគុណចំពោះអ្វីដែលនឹងបញ្ជូនមកដល់ ប៉ុន្តែឱ្យបានលឿន» ខណៈដែលរុស្ស៊ីមានអាវុធលើសខ្លួន «រាប់រយដង» និងទំនើបៗ។
ចាប់តាំងពីទីក្រុងម៉ូស្គូបើកការឈ្លានពាន រដ្ឋបាលលោក បៃដិន បានដាក់ពង្រាយទាហានអាមេរិកជាង ១ សែននាក់ទៅកាន់ប្រទេសជាសមាជិកណាតូ និងផ្តល់ជំនួយផ្នែកសន្តិសុខជាង ៥,៦ ប៊ីលានដុល្លារ។
ប្រភព៖ CNBC
