ប្រធានាធិបតីចិនលោក ស៊ី បញ្ជាក់ជាថ្មីនូវការគាំទ្រចំពោះកង្វល់សន្តិសុខរបស់រុស្ស៊ី
ប្រធានាធិបតីចិនលោក ស៊ី ជិនពីង បញ្ជាក់ជាថ្មីនូវការគាំទ្ររបស់ក្រុងប៉េកាំងចំពោះការព្រួយបារម្ភអំពីបញ្ហាអធិបតេយ្យភាព និងសន្តិសុខរបស់រុស្ស៊ី ដែលកំពុងសម្រុកការឈ្លានពានរបស់ខ្លួននៅតំបន់ដុនបាសនៃប្រទេសអ៊ុយក្រែន។
យោងតាមការចុះផ្សាយរបស់សារព័ត៌មានចិនស៊ីនហួ លោក ស៊ី បានប្រាប់មេដឹកនាំរុស្ស៊ី លោក វ៉្លាឌីមៀ ពូទីន ក្នុងកិច្ចសន្ទនាតាមទូរស័ព្ទកាលពីថ្ងៃពុធថា៖ «ភាគីទាំងអស់គួរតែជំរុញឱ្យមានទំនួលខុសត្រូវសម្រាប់ការដោះស្រាយវិបត្តិអ៊ុយក្រែន»។
វិមានក្រឹមឡាំងនិយាយក្នុងសេចក្ដីថ្លែងការណ៍អំពីកិច្ចសន្ទនាទូរស័ព្ទថា លោក ពូទីន «បានគូសបញ្ជាក់ការវាយតម្លៃជាមូលដ្ឋានរបស់លោកអំពីស្ថានភាពនៅអ៊ុយក្រែន» ហើយលោក ស៊ី «បានកត់សម្គាល់ពីភាពស្របច្បាប់នៃសកម្មភាពដែលធ្វើឡើងដោយប្រទេសរុស្ស៊ីដើម្បីការពារផលប្រយោជន៍ជាតិជាមូលដ្ឋានក្នុងការប្រឈមមុខនឹងបញ្ហាប្រឈមចំពោះសន្តិសុខរបស់ខ្លួនដែលបង្កើតឡើងដោយកងកម្លាំងខាងក្រៅ»។
តាំងពីរុស្ស៊ីបើកការឈ្លានពាននៃ «ប្រតិបត្តិការយោធាពិសេស» របស់ខ្លួន រដ្ឋាភិបាលសម្ព័ន្ធមិត្តចិនបានបរាជ័យក្នុងការហៅសកម្មភាពរបស់រុស្ស៊ីថាជាការឈ្លានពាន ហើយចោទអង្គការណាតូ និងលោកខាងលិចថាញុះញង់ក្រុងម៉ូស្គូឱ្យធ្វើការវាយប្រហារអ៊ុយក្រែន ដែលជាប្រទេសមានឯករាជ្យ និងអធិបតេយ្យភាពផ្ទាល់ខ្លួន។
អ្នកនាំពាក្យក្រសួងការបរទេសអាមេរិកនិយាយថា៖ «ចិនអះអាងថាខ្លួនមានអព្យាក្រឹតភាព ប៉ុន្តែអាកប្បកិរិយារបស់ប្រទេសនេះបញ្ជាក់យ៉ាងច្បាស់ថាខ្លួននៅតែវិនិយោគក្នុងទំនាក់ទំនងជិតស្និទ្ធជាមួយរុស្ស៊ី»។
ប៉ុន្មានសប្តាហ៍មុនពេលរុស្ស៊ីចាប់ផ្តើមប្រតិបត្តិការរបស់ខ្លួននៅចុងខែកុម្ភៈ លោក ពូទីន និងលោក ស៊ី បានជួបប្រជុំគ្នានៅទីក្រុងប៉េកាំង និងត្រួតពិនិត្យការចុះហត្ថលេខាលើកិច្ចព្រមព្រៀងដោយសន្យាថាទំនាក់ទំនងរវាងភាគីនឹង «គ្មានដែនកំណត់»។
ក្នុងជំនួបដែលធ្វើឡើងប៉ុន្មានម៉ោងមុនព្រឹត្តិការណ៍កីឡាអូឡាំពិករដូវរងាក្រុងប៉េកាំងចាប់ផ្តើម មេដឹកនាំទាំង២បានបង្ហាញការទប់ទល់នឹងសម្ពាធពីសហរដ្ឋអាមេរិក ដោយប្រកាសការប្រឆាំងរបស់ខ្លួនចំពោះការពង្រីករបស់ណាតូ និងបញ្ជាក់ថាកោះតៃវ៉ាន់ជាផ្នែកមួយនៃប្រទេសចិន។
គេមិនដឹងថាពេលនោះ ចិនដឹងថារុស្ស៊ីនឹងមានផែនការយ៉ាងណាទេចំពោះអ៊ុយក្រែន ប៉ុន្តែចាប់តាំងពីការឈ្លានពានអ៊ុយក្រែន ចិនតែងតែផ្ដល់ការគាំទ្រលើរុស្ស៊ីរាប់តាំងពីនិយាយការពារលើឆាកអន្តរជាតិ រហូតដល់ការទិញប្រេង ខណៈព្យាយាមបង្ហាញពីអព្យាក្រឹតរបស់ខ្លួនដើម្បីជៀសវាងពីផលប៉ះពាល់ដែលអាចកើតមានពីការគាំទ្រទាំងនោះចំពេលរុស្ស៊ីរងទណ្ឌកម្មពីបស្ចិមលោក ដែលជាដៃគូពាណិជ្ជកម្មសំខាន់របស់ចិន។
ប្រភព៖ Aljazeera
