តួកគីយល់ព្រមគាំទ្រហ្វាំងឡង់និងស៊ុយអែតចូលណាតូ ក្រោយសម្រេចបានកិច្ចព្រមព្រៀងត្រីភាគី
ទីបំផុតប្រទេសតួកគីបានយល់ព្រមលើកសិទ្ធវេតូបដិសេធសម្រាប់បេក្ខភាពរបស់ប្រទេសស៊ុយអែតនិងហ្វំាងឡង់ចូលជាសមាជិករបស់អង្គការសន្ធិសញ្ញាអាត្លង់ទិកខាងជើង ដែលគេហៅកាត់ថា «ណាតូ» ក្រោយប្រទេសទាំងបីសម្រេចបានកិច្ចព្រមព្រៀងរួមមួយដើម្បីប្រឆាំងការគំរាមកំហែងផ្នែកសន្តិសុខ។
ខណៈពេលដែលប្រមុខដឹកនាំប្រទេសចំនួន៣០ដែលជាសមាជិកនៃអង្គការនេះកំពុងជួបប្រជុំរហូតដល់ថ្ងៃទី៣០ខែមិថុនានៅទីក្រុងម៉ាឌ្រីដនៃប្រទេសអេស្ប៉ាញ តាមការចេញផ្សាយរបស់បណ្តាញព័ត៌មាន CNBC លោក Sauli Niinisto ប្រធានាធិបតី ហ្វាំងឡង់ បានឲ្យដឹងនៅក្នុងសេចក្តីថ្លែងការណ៍មួយថា រដ្ឋមន្ត្រីការបរទេសនៃប្រទេសទាំងបីបានចុះហត្ថលេខាលើអនុស្សរណៈមួយដើម្បីបញ្ជាក់ថាតួកគីនឹងគាំទ្រការខិតខំប្រឹងប្រែងរបស់ស៊ុយអែត និងហ្វាំងឡង់សម្រាប់ចូលជាសមាជិករបស់ណាតូ។
មេដឹកនាំហ្វាំងឡង់បាននិយាយថា៖«អនុស្សរណៈរួមរបស់យើងបានគូសបញ្ជាក់ពីការប្តេជ្ញាចិត្តរបស់ប្រទេសហ្វាំងឡង់ ស៊ុយអែត និងតួកគី ដើម្បីពង្រីកការគាំទ្រពេញលេញរបស់ពួកគេប្រឆាំងនឹងការគំរាមកំហែងដល់សន្តិសុខរបស់គ្នាទៅវិញទៅមក»។
លោកបានបន្ថែមថា៖«យើងដែលនឹងក្លាយជាសម្ព័ន្ធមិត្តណាតូ នឹងពង្រឹងបន្ថែមទៀតនូវការប្តេជ្ញាចិត្តនេះ»។
ការជំរុញដើម្បីបន្ថែមស៊ុយអែត និងហ្វាំងឡង់ទៅក្នុងសម្ព័ន្ធអង្គការប្រដាប់អាវុធណាតូ កើតឡើងនៅពេលដែលការវាយលុករបស់រុស្ស៊ីលើអ៊ុយក្រែន បង្កការភ័យខ្លាចដល់ប្រទេសផ្សេងទៀតនៅក្នុងតំបន់។ ទីក្រុងម៉ូស្គូដែលតែងតែជំទាស់ជាយូរមកហើយចំពោះការពង្រីកអង្គការណាតូបានប្រឆាំងនឹងផែនការរបស់ប្រទេសទាំងពីរក្នុងការចូលរួមសម្ព័ន្ធភាព។
កន្លងមក ប្រធានាធិបតីតួកគីលោក រ៉េសិប តៃយីប អេរដូហ្គែន (Recep Tayyip Erdogan) បាននិយាយថា លោកនឹងមិនយល់ព្រមលើពាក្យសុំចូលជាសមាជិកនៃប្រទេសទាំងពីរនេះទេ ដោយលើកឡើងពីការគាំទ្ររបស់ពួកគេចំពោះអង្គការឃឺដ ដែលតួកគីចាត់ទុកការគំរាមកំហែងផ្នែកសន្តិសុខ។
សមាជិកណាតូទាំង៣០ ត្រូវតែយល់ព្រមលើការខិតខំប្រឹងប្រែងរបស់ប្រទេសមួយ ដើម្បីត្រូវគេទទួលយកទៅក្នុងសម្ព័ន្ធភាព។
យោងតាមទីភ្នាក់ងារព័ត៌មានបារាំង AFP កាលពីសប្តាហ៍មុន បានផ្សាយថា លោក ជេនស៍ ស្តូលថេនប៊ើក (Jens Stoltenberg) អគ្គលេខាធិការណាតូ បានប្រាប់អ្នកយកព័ត៌មានថាគាត់កំពុងធ្វើការដើម្បីបន្ថែមហ្វាំងឡង់ និងស៊ុយអែតទៅក្នុងអង្គការណាតូ «ឱ្យបានឆាប់តាមដែលអាចធ្វើទៅបាន»។
លោកបាននិយាយថា ការចូលជាសមាជិកនៃប្រទេសទាំងពីរនឹងធ្វើឱ្យពួកគេមានសុវត្ថិភាព អង្គការណាតូកាន់តែរឹងមាំ និងតំបន់អឺរ៉ូ-អាត្លង់ទិកកាន់តែមានសុវត្ថិភាព។
ទាំងហ្វាំងឡង់ និងស៊ុយអែតបានបំពេញលក្ខខណ្ឌជាច្រើនក្នុងការក្លាយជាសមាជិកណាតូ។ តម្រូវការមួយចំនួនរួមមានការមានប្រព័ន្ធនយោបាយប្រជាធិបតេយ្យដែលដំណើរការ ឆន្ទៈក្នុងការផ្តល់នូវតម្លាភាពសេដ្ឋកិច្ច និងសមត្ថភាពក្នុងការរួមចំណែកយោធាក្នុងបេសកកម្មរបស់ណាតូ។
នៅក្នុងខែឧសភា ប្រទេសទាំងពីរបានចាប់ផ្តើមដំណើរការជាផ្លូវការនៃការដាក់ពាក្យសុំចូលជាសម្ព័ន្ធមិត្តរបស់អង្គការណាតូ។ ក្រោយមកសហរដ្ឋអាមេរិកបានគាំទ្រយ៉ាងខ្លាំងចំពោះបេក្ខភាពទាំងពីរនេះ។
បន្ទាប់ពីប្រទេសទាំងពីរបានដាក់សំណើរបស់ពួកគេ លោកប្រធានាធិបតី Joe Biden បាននិយាយថា ប្រទេសទាំងពីរនឹង«ធ្វើឲ្យអង្គការណាតូកាន់តែខ្លាំង»។ លោកបានហៅចំណាត់ការរបស់ពួកគេក្នុងការចូលរួមក្នុងកតិកាសញ្ញានេះថាជា «ជ័យជម្នះសម្រាប់លទ្ធិប្រជាធិបតេយ្យ»៕
