លោក ហ្សេលេនស្គី បានបណ្ដេញអ្នកការទូតអ៊ុយក្រែនប្រចាំអាល្លឺម៉ង់ និងប្រចាំប្រទេសផ្សេងទៀត
គេហទំព័រប្រធានាធិបតីអ៊ុយក្រែននិយាយថា លោក វ៉ូឡូឌីមៀរ ហ្សេលេនស្គី កាលពីថ្ងៃសៅរ៍ បានបណ្ដេញចេញបេសកជនការទូតជាន់ខ្ពស់របស់ក្រុងកៀវជាច្រើននាក់នៅបរទេស រួមទាំងឯកអគ្គរដ្ឋទូតប្រចាំប្រទេសអាល្លឺម៉ង់ផង។
ក្នុងក្រឹត្យមួយដែលមិនផ្តល់ហេតុផលសម្រាប់ចំណាត់ការនេះ លោក ហ្សេលេនស្គី បានប្រកាសបណ្ដេញឯកអគ្គរដ្ឋទូតអ៊ុយក្រែនប្រចាំប្រទេសអាល្លឺម៉ង់ ឥណ្ឌា សាធារណរដ្ឋឆេក ន័រវេស និងហុងគ្រី។ គេមិនទាន់ដឹងច្បាស់ទេ ថាតើបេសកជនដែលត្រូវបណ្ដេញនឹងត្រូវតែងតាំងមុខតំណែងថ្មីឬអត់នោះទេ។
លោក ហ្សេលេនស្គី បានជំរុញឱ្យអ្នកការទូតរបស់លោកបង្កើនការគាំទ្រអន្តរជាតិ និងជំនួយយោធាសម្រាប់អ៊ុយក្រែន ខណៈអ៊ុយក្រែនព្យាយាមទប់ទល់នឹងការឈ្លានពានរបស់រុស្ស៊ី។
ទំនាក់ទំនងរបស់ក្រុងកៀវនិងអាល្លឺម៉ង់ដែលពឹងផ្អែកខ្លាំងលើការផ្គត់ផ្គង់ថាមពលរបស់រុស្ស៊ីមានភាពរសើបជាពិសេស។ លោក Andriy Melnyk ដែលតែងតាំងជាឯកអគ្គរដ្ឋទូតប្រចាំប្រទេសអាល្លឺម៉ង់នៅចុងឆ្នាំ ២០១៤មានភាពល្បីល្បាញក្នុងចំណោមអ្នកនយោបាយ និងអ្នកការទូតនៅទីក្រុងប៊ែរឡាំង។
លោកMelnyk តែងនិយាយរិះគន់អ្នកនយោបាយ ឬបុគ្គលណាដែលប្រឆាំងនឹងការផ្ដល់ជំនួយដល់អ៊ុយក្រែន ដើម្បីប្រឆាំងការឈ្លានពានរបស់រុស្ស៊ី។លោកធ្លាប់ហៅប្រធានាធិបតីអាល្លឺម៉ង់លោកOlaf Scholz ថាមានអាកប្បកិរិយាដូច «សាច់ក្រកឆាប់អន់ចិត្ត» ដែលជាគ្រាមភាសាអាល្លឺម៉ង់ ពេលលោកScholzមិនទទួលយកការអញ្ជើញរបស់ ហ្សេលេនស្គី ទៅទស្សនៈកិច្ចនៅក្រុងកៀវភ្លាម។ ការដកតួរនាទីនេះ ធ្វើឡើងខណៈដែលក្រុងកៀវ និងក្រុងប៊ែរឡាំងកំពុងមានភាពចម្រូងចម្រាស់លើទួរប៊ីនផលិតដោយអាល្លឺម៉ង់ដែលកំពុងដំណើរការនៅកាណាដា។ អាល្លឺម៉ង់ចង់ឱ្យកាណាដាប្រគល់ទួរប៊ីនទៅឱ្យក្រុមហ៊ុនឧស្ម័នធម្មជាតិរុស្ស៊ីGazprom ដើម្បីបង្ហូរហ្គាសទៅកាន់អឺរ៉ុប។ ក្រុងកៀវជំរុញឱ្យកាណាដារក្សាទួរប៊ីនដោយនិយាយថាការដឹកជញ្ជូនវាទៅរុស្ស៊ីនឹងជាការរំលោភលើទណ្ឌកម្មដែលដាក់លើទីក្រុងម៉ូស្គូ។
ប្រភព៖ The Straits Times
