UN នឹងស៊ើបអង្កេតការសម្លាប់កុមារនៅអ៊ុយក្រែន អេត្យូពី ម៉ូហ្សំប៊ិក
អគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូតែរ៉េស (Antonio Guterres)និយាយនៅក្នុងរបាយការណ៍ថ្មីមួយកាលពីថ្ងៃចន្ទថា មន្ត្រីអង្គការសហប្រជាជាតិនឹងស៊ើបអង្កេតការសម្លាប់ និងធ្វើឱ្យរបួសកុមារនៅប្រទេសអ៊ុយក្រែន អេត្យូពី និងម៉ូហ្សំប៊ិក។
ក្នុងរបាយការណ៍ប្រចាំឆ្នាំស្ដីពី «កុមារ និងជម្លោះប្រដាប់អាវុធ» កុមារចំនួន ២៥១៥ នាក់ត្រូវបានសម្លាប់ និង ៥ ៥៥៥ នាក់ត្រូវរងរបួសក្នុងជម្លោះឆ្នាំ ២០២១។ការរំលោភបំពានផ្សេងទៀតដែលរបាយការណ៍រកឃើញរួមមានការចាប់ពង្រត់ អំពើហិង្សាផ្លូវភេទ ការវាយប្រហារលើសាលារៀន និងមន្ទីរពេទ្យ និងការបដិសេធជំនួយអំឡុងពេលមានជម្លោះ។
របាយការណ៍បានរកឃើញថាចំនួនខ្ពស់បំផុតនៃការរំលោភបំពានលើកុមារក្នុងឆ្នាំ២០២១គឺនៅក្នុងប្រទេសយេម៉ែន ស៊ីរី អាហ្វហ្គានីស្ថាន សាធារណរដ្ឋប្រជាធិបតេយ្យកុងហ្គោ សូម៉ាលី អ៊ីស្រាអែល និងប៉ាឡេស្ទីន។លោកហ្គូតែរ៉េស និយាយថា របាយការណ៍នៅឆ្នាំក្រោយនឹងរួមបញ្ចូលការបំពានប្រឆាំងនឹងកុមារនៅអ៊ុយក្រែន អេត្យូពី និងម៉ូហ្សំប៊ិក។
បេសកជនពិសេសរបស់ប្រធានអង្គការសហប្រជាជាតិទទួលបន្ទុកកុមារ និងជម្លោះប្រដាប់អាវុធ លោកVirginia Gamba និយាយថា ការរំលោភដែលពាក់ព័ន្ធបំផុត២ដែលកើតចេញពីជម្លោះក្នុងប្រទេសអ៊ុយក្រែន គឺការសម្លាប់ និងធ្វើឱ្យកុមាររបួស និងការវាយប្រហារលើសាលារៀន និងមន្ទីរពេទ្យ។លោកGamba ដែលចងក្រងរបាយការណ៍ប្រចាំឆ្នាំរបស់អង្គការសហប្រជាជាតិនិយាយថា អំពើទាំង២នឹងមានកម្រិតខ្ពស់។
ប្រធានសិទ្ធិមនុស្សអង្គការសហប្រជាជាតិអ្នកស្រី Michelle Bachelet និយាយកាលពីសប្តាហ៍មុនថា គិតត្រឹមថ្ងៃទី០៣ខែកក្កដា ជនស៊ីវិលប្រហែល៤ ៨៨៩ ត្រូវបានសម្លាប់នៅអ៊ុយក្រែន ក្នុងនោះមាន ៣៣៥ នាក់ ហើយតួរលេខនៅនឹងកន្លែងប្រាកដជាខ្ពស់ជាងនេះ។
របាយការណ៍ស្តីពីជម្លោះប្រដាប់អាវុធ និងកុមារ រួមមានបញ្ជីខ្មៅដែលមានបំណងធ្វើឱ្យភាគីជម្លោះអាម៉ាស់ ក្នុងក្តីសង្ឃឹមជំរុញឱ្យពួកគេអនុវត្តវិធានការដើម្បីការពារកុមារ។របាយការណ៍នេះមានភាពចម្រូងចម្រាសជាយូរណាស់មកហើយ ដោយអ្នកការទូតនិយាយថា អារ៉ាប៊ីសាអូឌីតប្រើកម្លាំងនៅយ៉េមែននិងអ៊ីស្រាអែលប្រើកម្លាំងលើប៉ាឡេស្ទីនបានដាក់សម្ពាធក្នុងប៉ុន្មានឆ្នាំចុងក្រោយនេះ ក្នុងគោលបំណងដើម្បីគេចចេញពីបញ្ជីខ្មៅរបស់អង្គការសហប្រជាជាតិ។
ប្រភព៖ Aljazeera
