កិច្ចប្រជុំចតុភាគីលើការនាំចេញផលិតផលស្បៀងអាហារពីអ៊ុយក្រែននិងរុស្ស៊ី មានពន្លឺខ្លះ បន្ទាប់ពីរុស្ស៊ីរងសម្ពាធខ្លាំងពីអន្តរជាតិ
កិច្ចប្រជុំចតុភាគីលើកដំបូងរវាងរុស្ស៊ី អ៊ុយក្រែន តួកគី និងមន្ត្រីអង្គការសហប្រជាជាតិកាលពីថ្ងៃពុធនៅប្រទេសតួកគី បានរកឃើញពន្លឺខ្លះសម្រាប់ការបើកផ្លូវឲ្យមានការនាំចេញផលិតផលធញ្ញជាតិ ដែលពិភពលោកចោទរុស្ស៊ីថាបានបិទខ្ទប់ផ្លូវសមុទ្រមិនឲ្យអ៊ុយក្រែននាំចេញនិងនាំឲ្យអន្តរជាតិដាក់សម្ពាធយ៉ាងខ្លាំងលើប្រទេសរុស្ស៊ី។
ការជួបពិភាក្សាគ្នានៅទីក្រុងអ៊ីស្តង់ប៊ុលប្រទេសតួកគីកាលពីថ្ងៃពុធ រវាងរុស្ស៊ី និងអ៊ុយក្រែន ជាមួយ មន្ត្រីអង្គការសហប្រជាជាតិ និងតួកគី ក្នុងគោលបំណងបំបែកភាពជាប់គាំងរយៈពេលជាច្រើនខែជុំវិញការនាំចេញគ្រាប់ធញ្ញជាតិ ដែលបានមើលឃើញថាតម្លៃស្បៀងអាហារកើនឡើង ហើយមនុស្សរាប់លាននាក់ប្រឈមនឹងភាពអត់ឃ្លាន។
បន្ទាប់កិច្ចប្រជុំអគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គោទែរ៉េស (Antonio Guterres) បាននិយាយថា លោកមានក្តីសង្ឃឹមថា អ្នកចរចារុស្ស៊ី និងអ៊ុយក្រែន អាចឈានដល់កិច្ចព្រមព្រៀងផ្លូវការមួយ ដើម្បីបើកផ្លូវឲ្យមានការនាំចេញគ្រាប់ធញ្ញជាតិតាមរយៈសមុទ្រខ្មៅឱ្យបានឆាប់នៅសប្តាហ៍ក្រោយ។
អគ្គលេខាធិការដែលបានថ្លែងនិងផ្សព្វផ្សាយដោយគេហទំព័រអង្គការសហប្រជាជាតិ លើកឡើងថា៖«ថ្ងៃនេះក្នុងទីក្រុងអ៊ីស្តង់ប៊ុល យើងឃើញមានការបោះជំហានដ៏សំខាន់ឆ្ពោះទៅរកការធានាការនាំចេញផលិតផលអាហាររបស់អ៊ុយក្រែនប្រកបដោយសុវត្ថិភាពនិងធានាតាមរយៈសមុទ្រខ្មៅ»។
បណ្តាញព័ត៌មានdw របស់អាល្លឺម៉ង់ បានផ្សាយថា លោក Guterres បាននិយាយបន្ទាប់ពីកិច្ចប្រជុំថា៖«យើងសង្ឃឹមថាយើងនឹងអាចកោះប្រជុំឡើងវិញបានក្នុងពេលឆាប់ៗ ខ្ញុំប្រាកដថានៅសប្តាហ៍ក្រោយ ហើយសង្ឃឹមថាយើងនឹងអាចមានកិច្ចព្រមព្រៀងចុងក្រោយមួយ»។
លោកបាននិយាយថា មាន«កិច្ចព្រមព្រៀងទូលំទូលាយ» លើផែនការរបស់អង្គការសហប្រជាជាតិ ក្នុងការនាំចេញគ្រាប់ធញ្ញជាតិរាប់លានតោនដែលត្រូវបានរារាំងដោយសារតែសង្គ្រាមក្នុងប្រទេសអ៊ុយក្រែនទៅកាន់ទីផ្សារពិភពលោក ហើយអាចឱ្យរុស្ស៊ីនាំចេញគ្រាប់ធញ្ញជាតិ និងជីផងដែរ។
កិច្ចប្រជុំកម្រិតខ្ពស់នៅទីក្រុងអ៊ីស្តង់ប៊ុលលើកនេះកើតឡើងជាមួយនឹងការលុកលុយរបស់រុស្ស៊ីលើអ៊ុយក្រែនដែលបង្ហាញពីសញ្ញានៃការធូរស្រាល ហើយភាគីសង្គ្រាមត្រូវបានខ្ទប់ជាប់នៅក្នុងសមរភូមិការបាញ់ប្រហារពីចម្ងាយដ៏ក្ដៅគគុក ដែលកំពុងបំផ្លាញទីក្រុងជាច្រើន និងបណ្តាលឲ្យ មនុស្សគ្មានអ្វីសោះ។
ភាគីអ៊ុយក្រែន និងរុស្ស៊ីបានឈានដល់កិច្ចព្រមព្រៀង «មូលដ្ឋាន និងបច្ចេកទេស»ដ៏សំខាន់ ដើម្បីផ្លាស់ទីការនាំចេញគ្រាប់ធញ្ញជាតិសំខាន់ៗចេញពីកំពង់ផែសមុទ្រខ្មៅដែលត្រូវបានរារាំង នេះបើយោងតាមរដ្ឋាភិបាលរបស់ប្រទេសតួកគី ដែលបានធ្វើជាអ្នកផ្សះផ្សាយជម្លោះ។ នេះបើតាមការចេញផ្សាយរបស់កាសែត Politico នៃទីក្រុងប្រ៊ុចសែល។
ជំហានវិជ្ជមានដែលត្រូវបានប្រកាសដោយរដ្ឋមន្ត្រីការពារជាតិរបស់ទីក្រុងអង់ការ៉ា លោក Hulusi Akar បានធ្វើឡើងបន្ទាប់ពីកិច្ចពិភាក្សានៅទីក្រុងអ៊ីស្តង់ប៊ុលរវាងភាគីផ្សេងៗគ្នា បន្ទាប់ពីមានភាពជាប់គាំងជាច្រើនខែ។
ការដឹកជញ្ជូនគ្រាប់ធញ្ញជាតិពីអ៊ុយក្រែនតាមកំពង់ផែសមុទ្រខ្មៅត្រូវបានបញ្ឈប់ចាប់តាំងពីរុស្ស៊ីបានឈ្លានពាននៅចុងខែកុម្ភៈ។ គ្រាប់ធញ្ញជាតិរាប់លានតោនដែលត្រូវការសម្រាប់ចិញ្ចឹមប្រជាជនក្នុងប្រទេសដែលពឹងផ្អែកលើការនាំចូលនៅតាមតំបន់ផ្សេងៗទៀត ដូចជាមជ្ឈិមបូព៌ា និងអាហ្រ្វិកកំពុងស្ថិតក្នុងសន្និធិ ដោយតម្លៃអាហារដែលមានកើនឡើងអតិផរណាយ៉ាងខ្លាំង។
ភាគីជម្លោះបានប៉ះទង្គិចគ្នាយ៉ាងខ្លាំងក្នុងកិច្ចប្រជុំថ្នាក់ដឹកនាំក្រសួងការបរទេសក្នុងក្របខ័ណ្ឌប្រទេសអភិវឌ្ឍន៍សេដ្ឋកិច្ចទាំង២០ ដែលគេស្គាល់ថា «G20» ដែលត្រូវបានរៀបចំឡើងនៅប្រទេសឥណ្ឌនេស៊ីកាលពីថ្ងៃទី៨ខែកក្កដានេះ។
យោងតាមការផ្សាយរបស់ VOA ប្រមុខក្រសួងការបទេសរុស្ស៊ី លោក សឺហ្គេយ ឡាវរ៉ូវ (Sergey Lavrov) បានដើរចេញពីកិច្ចប្រជុំថ្នាក់រដ្ឋមន្ត្រីការបរទេស G20 ចំនួនពីរលើក គឺមួយលើកនៅពេលដែល លោក Annalena Baerbock រដ្ឋមន្ត្រីការបរទេសអាល្លឺម៉ង់ថ្លែងអំឡុងពេលកិច្ចដោយពិភាក្សាការការពង្រឹងពហុភាគីនិយម និង មួយលើកទៀតនៅពេលដែលរដ្ឋមន្ត្រីការបរទេសអ៊ុយក្រែន លោក Dmytro Kuleba ថ្លែងតាមវីដេអូពីចម្ងាយក្នុងផ្នែកនៃសន្តិសុខម្ហូបអាហារនិងថាមពល។
រដ្ឋមន្ត្រីការបរទេសរុស្ស៊ីក៏មិនបានស្តាប់រដ្ឋមន្ត្រីការបរទេសអាមេរិក លោក អានតូនី ប្ល៊ីនកែន (Antony Blinken) ថ្លែងដែរ។
VOA បានដកស្រង់សម្តីលោក ប្ល៊ីនកែន ដូចបានថ្លែងថា៖«ចំពោះសហការីរុស្ស៊ីរបស់យើងៈ អ៊ុយក្រែនមិនមែនជាប្រទេសរបស់អ្នក។ វាមិនមែនជាធញ្ញជាតិរបស់អ្នកទេ។ ហេតុអ្វីអ្នកបិទខ្ទប់កំពង់ផែ? អ្នកគួរតែអនុញ្ញាតឲ្យនាំចេញគ្រាប់ធុញជាតិ»។
កិច្ចពិភាក្សាទល់មុខគ្នាជាលើកដំបូងរវាងគណៈប្រតិភូរុស្ស៊ី និងអ៊ុយក្រែន ចាប់តាំងពីកិច្ចប្រជុំដែលគ្មានដំណោះស្រាយនយោបាយបញ្ចប់សង្គ្រាមនិងបើកច្រកសម្រាប់នាំចេញ នៅទីក្រុងអ៊ីស្តង់ប៊ុលកាលពីថ្ងៃទី២៩ខែមីនាក្រោយរុស្ស៊ីឈ្លានពានប្រមាណ១ខែ។ ក្រោយពីនោះមកមានការគំរាមកំហែងនៃការខ្វះខាតស្បៀងអាហាររីករាលដាលនៅទូទាំងតំបន់ក្រីក្របំផុតនៃពិភពលោក។
អ៊ុយក្រែនជាប្រទេសនាំចេញស្រូវសាលី និងគ្រាប់ធញ្ញជាតិដ៏សំខាន់ដូចជាស្រូវសាលី និងពោត។ អ៊ុយក្រែនក៏បានផ្គត់ផ្គង់ជិតពាក់កណ្តាលនៃប្រេងផ្កាឈូករ័ត្នទាំងអស់ដែលត្រូវបានជួញដូរនៅលើទីផ្សារពិភពលោក។
លោក Lyubov Mozhayeva អ្នកជំនាញខាងកសិកម្មអាយុ៦០ឆ្នាំបានប្រាប់ទីភ្នាក់ងារបារាំង AFP ថា៖«អ្នកមិនអាចរត់គេចពីសង្រ្គាមបានទេ ហើយអ្នកមិនដឹងថាវានឹងនាំអ្នកទៅណាទេ»។
AFP បានលើកឡើងថាការចរចានៅអ៊ីស្តង់ប៊ុលកំពុងមានភាពស្មុគស្មាញដោយការសង្ស័យកាន់តែខ្លាំងឡើងថា រុស្ស៊ីកំពុងព្យាយាមនាំចេញគ្រាប់ធញ្ញជាតិដែលខ្លួនបានលួចពីកសិករអ៊ុយក្រែននៅក្នុងតំបន់ដែលស្ថិតនៅក្រោមការគ្រប់គ្រងរបស់រុស្ស៊ី។
ទិន្នន័យរបស់ទីភ្នាក់ងារអវកាសអាមេរិកដែលបានចេញផ្សាយកាលពីសប្តាហ៍មុនបានបង្ហាញថា ២២ភាគរយនៃដីស្រែរបស់អ៊ុយក្រែនបានធ្លាក់នៅក្រោមការគ្រប់គ្រងរបស់រុស្ស៊ីចាប់តាំងពីការឈ្លានពានថ្ងៃទី២៤ខែកុម្ភៈ។
របាយការណ៍របស់អង្គការសហប្រជាជាតិដែលលើកឡើងដោយមន្ត្រីអង្គការសហប្រជាជាតិកន្លងមក ប្រទេសចំនួន ៩៤ ដែលត្រូវបានប៉ាន់ប្រមាណ ដែលមានប្រជាជនប្រហែល ១,៦ពាន់លាននាក់ «ត្រូវបានប៉ះពាល់យ៉ាងធ្ងន់ធ្ងរទៅនឹងវិបត្តិស្បៀងអាហារ និងមិនអាចទប់ទល់ វាបានទេ»។
ប្រភព៖ DW
