ប្រធានាធិបតីបារាំង គ្រោងទស្សនកិច្ចអាល់ហ្ស៊េរី ដើម្បីស្តារទំនាក់ទំនងដែលជាប់គាំងឡើងវិញ
ការិយាល័យប្រធានាធិបតីបានឱ្យដឹងកាលពីថ្ងៃសៅរ៍ថាលោកប្រធានាធិបតីបារាំង អេម៉ានុយអែល ម៉ាក្រុង នឹងទៅទស្សនកិច្ចអតីតអាណានិគមអាល់ហ្ស៊េរីនៅសប្តាហ៍ក្រោយ ក្នុងកិច្ចខិតខំប្រឹងដើម្បីស្តារទំនាក់ទំនងដែលជាប់គាំងឡើងវិញរវាងទីក្រុងប៉ារីស និងអាល់ហ្ស៊េ។
ទំនាក់ទំនងបារាំង-អាល់ហ្ស៊េរីបានធ្លាក់ចុះយ៉ាងខ្លាំងកាលពីឆ្នាំមុននេះក្រោយពីលោកម៉ាក្រុងបានចោទសួរថាតើអាល់ហ្ស៊េរីបានកើតជាប្រទេសមួយហើយឬយ៉ាងណានៅមុនការឈ្លានពានរបស់បារាំងនិងបានចោទប្រកាន់ប្រព័ន្ធនយោបាយយោធារបស់ប្រទេសនេះថាបានសរសេរប្រវត្តិសាស្ត្រជាថ្មីនិងនាំឱ្យមានការស្អប់ប្រទេសបារាំង។
ជាការឆ្លើយទបនោះ ប្រទេសអាល់ហ្ស៊េរី បានដកស្ថានទូតរបស់ខ្លួន ប៉ុន្តែភាគីទាំង២ ក៏ទំនងជាបានជួសជុលទំនាក់ទំនងនាពេលនោះដែរ។
ការិយាល័យប្រធានាធិបតីបានបញ្ជាក់ នៅក្នុងសេចក្តីថ្លែងការណ៍ក្រោយពីការសន្ទនាមួយរវាងលោកម៉ាក្រុងនិងលោកប្រធានាធិបតីអាល់ហ្ស៊េរី Abdelmadjid Tebbouneថា៖«ដំណើរទស្សនកិច្ចនេះនឹងចូលរួមចំណែកដល់ការធ្វើឱ្យទំនាក់ទ្វេភាគីកាន់តែស៊ីជម្រៅង ដោយសម្លឹងមើលទៅអនាគត…ពង្រឹងកិច្ចសហប្រតិបត្តិការបារាំង-អាល់ហ្ស៊េរីក្នុងការប្រឈមនឹងបញ្ហាប្រឈមនានាក្នុងតំបន់ និងបន្តការងារដោះស្រាយបញ្ហាអតីតកាល។
លោកម៉ាក្រុងត្រូវធ្វើទស្សនកិច្ចពីថ្ងៃព្រហស្បតិ៍ដល់ថ្ងៃសៅរ៍សប្តាហ៍ក្រោយ។
ប្រទេសអាហ្វ្រិកខាងជើងនេះ បានទទួលឯករាជ្យពីបារាំង បន្ទាប់ពីសង្គ្រាមរយៈពេល៨ឆ្នាំ ដែលបានបញ្ចប់ដោយចុះហត្ថលេខាកិច្ចព្រមព្រៀង Evian Accords ក្នុងខែមីនា ឆ្នាំ១៩៦២។
នៅថ្ងៃទី៥ ខែកក្កដា១៩៦២នោះដែរ រយៈពេលប៉ុន្មានថ្ងៃក្រោយពីប្រជាជន៩៩,៧២ភាគបានបោះឆ្នោតទាមទារឯករាជ្យនៅក្នុងធ្វើប្រជាមតិមួយទីបញ្ចប់អាល់ហ្ស៊េរីបានចេញផុតពីការគ្រប់គ្រងអាណានិមប៉ុន្តែការរំឭកនៃការកាន់កាប់១៣២ឆ្នាំ បន្តប៉ះពាល់ដល់ចំណងទំនាក់ទំនងរបស់ខ្លួនជាបារំាង។
សង្គ្រាមឯករាជ្យរបស់អាល់ហ្ស៊េរីបានបណ្តាលឱ្យមនុស្សរាប់ម៉ឺននាក់ស្លាប់។
អ្នកប្រវត្តិសាស្ត្របារាំងនិយាយថា ជនស៊ីវិលកន្លះលាននាក់និងទាហានបានស្លាប់ ៤០មឺុននាក់ក្នុងចំណោមពួកគេគឺជាជនជាតិអាល់ហ្ស៊េរីខណៈដែលអាជ្ញាធរអាល់ហ្ស៊េរី៏បានបញ្ជាក់ថា ១,៥លាននាក់បានស្លាប់។
ប៉ុន្តែមានរយៈពេល៦ទសវត្សរ៍កន្លងទៅហើយ ក៏ប្រទេសបារាំងមិនបានធ្វើការសុំទោសណាមួយចំពោះរយៈពេលអាណានិគមនោះដែរ។
ការិយាល័យប្រធានាធិបតី បានប្រកាសដំណើរទស្សនកិច្ចរបស់លោកម៉ាក្រុងខណៈដែលប្រទេសអាល់ហ្ស៊េរីរងការប៉ះពាល់យ៉ាងធ្ងន់ធ្ងរពីភ្លើងឆេះព្រៃ។
ភ្លើងឆេះព្រៃនៅអាល់ហ្ស៊េរីដែលបច្ចុប្បន្នត្រូវបានពន្លត់ទាំងស្រុងហើយនោះ បានបណ្តាលឱ្យមនុស្ស៣៨នាក់ស្លាប់និងបានបំផ្លាញតំបន់ជីវចម្រុះដែលចុះបញ្ជីដោយអង្គការ UNESCO ប្រមាណជាង១០ភាគរយ។
ក្រុមការពារស៊ីវិលអាល់ហ្ស៊េរីបាននិយាយថា អ្នកពន្លត់អគ្គិភ័យនៅតែបន្តពន្លត់ភ្លើងឆេះដែលបណ្តាលមកពីគ្រោះរាំងស្ងួត និងរលកកម្តៅនៅតំបន់ចុងខាងលិចនៃប្រទេសកាលពីថ្ងៃសៅរ៍។
យោងតាមប្រភពជាច្រើនក្នុងនោះមានអ្នកសារព័ត៌មាននិងសេវាពន្លត់អគ្គិភ័យមនុស្សយ៉ាងតិច៣៨នាក់ស្លាប់ ភាគច្រើននៅក្នុងខេត្តEl Tarf នៅក្បែរព្រំដែនខាងកើតអាល់ហ្ស៊េរីជាមួយទុយនីស៊ី។
ការិយាល័យប្រធានាធិបតីបានឱ្យដឹងថា លោកម៉ាក្រុង បានផ្តល់សេវាពន្លត់អគ្គិភ័យទាំងផ្លូវដីនិងផ្លូវអាកាសដើម្បីជួយពន្លត់។
ដំណើរទស្សនកិច្ចនោះ គឺលើកទី២របស់ប្រធានាធិបតីបារាំងរូបនេះទៅកាន់ប្រទេសអាល់ហ្ស៊េរីក្នុងនាមជាប្រមុខរដ្ឋ បន្ទាប់ពីទស្សនកិច្ចរយៈពេលខ្លីមួយនៅខែធ្នូ ឆ្នាំ២០១៧ នៅដើមអាណត្តិទី១របស់លោក នៅពេល Abdelaziz Bouteflika ជាប្រធានាធិបតីអាល់ហ្ស៊េរី។
ទស្សនកិច្ចនេះនឹងមានរយៈពេលវែង ហើយនឹងនាំលោកទៅកាន់រដ្ឋធានីអាល់ហ្ស៊េ និងទីក្រុងធំទី២គឺ Oran។
លោក Tebboune អតីតនាយករដ្ឋមន្ត្រីរបស់លោក Bouteflika បានឈ្នះការបោះឆ្នោតប្រធានាធិបតីក្នុងឆ្នាំ២០១៩ ក្រោយពីការតវ៉ាទ្រង់ទ្រាយធំបានបង្ខំឱ្យអ្នកកាន់តំណែងមុនមានវ័យចំណាស់ លាលែងពីតំណែង។ កាលពីដើមឆ្នាំនេះលោកបានអបអរសាទរលោកម៉ាក្រុងចំពោះការជាប់ឆ្នោតជាថ្មីនឹងបានអញ្ជើញលោកមកទស្សនកិច្ចអាល់ហ្ស៊េរី៕
ប្រភព៖ The Guardian
