មនុស្ស ១២ នាក់ស្លាប់ក្នុងការវាយប្រហារ ពីក្រុមសកម្មប្រយុទ្ធនៅសូម៉ាលី
មនុស្សយ៉ាងហោចណាស់ ១២ នាក់ ត្រូវបានសម្លាប់នៅក្នុងរដ្ឋធានីម៉ូហ្គាឌីស៊ូនៃប្រទេសសូម៉ាលី បន្ទាប់ពីក្រុមសកម្មប្រយុទ្ធដែលមានទំនាក់ទំនងនឹងក្រុមអាល់កៃដា បើកការវាយប្រហារលើសណ្ឋាគារមួយ ដោយចាប់មនុស្សធ្វើចំណាត់ខ្មាំង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ដែលស្រង់សម្ដីមន្រ្តីចារកម្មម្នាក់។
ក្រុមអ្នកវាយប្រហារ បានបំផ្ទុះផ្លូវរបស់ចូលទៅក្នុងសណ្ឋាគារHayat កាលពីល្ងាចថ្ងៃសុក្រ ជាមួយនឹងការបំផ្ទុះរថយន្តចំនួន២ មុនពេលបើកការបាញ់ប្រហារ។ ក្រុមបះបោរal Shabaabរបស់ប្រទេសសូម៉ាលី បានប្រកាសទទួលខុសត្រូវចំពោះការនេះ។
ប្រភពមិនបញ្ចេញឈ្មោះម្នាក់នៃមន្រ្តីស៊ូម៉ាលី ប្រាប់ទីភ្នាក់ងារសារព័ត៌មាន AFP កាលពីថ្ងៃសៅរ៍ថា ការចាប់ធ្វើជាចំណាត់ខ្មាំងជាង ៣០ ម៉ោង បានបញ្ចប់ហើយ ដោយខ្មាំងកាំភ្លើងម្នាក់ត្រូវបានសម្លាប់ ហើយមិនមានការបាញ់ប្រហារតទៀតនោះទេ។
ការវាយប្រហារកាលពីថ្ងៃសុក្រ គឺជាការវាយប្រហារដ៏ធំលើកដំបូង ចាប់តាំងពីលោកប្រធានាធិបតីHassan Sheikh Mohamud ចូលកាន់តំណែងក្នុងខែឧសភា។ ក្រុម Al Shabaabដែលទទួលខុសត្រូវ បានប្រយុទ្ធដើម្បីផ្តួលរំលំរដ្ឋាភិបាលសូម៉ាលីអស់រយៈពេលជាង១០ឆ្នាំមកហើយ ដោយចង់បង្កើតច្បាប់ផ្អែកលើការបកស្រាយយ៉ាងតឹងរឹងនៃច្បាប់អ៊ិស្លាមរបស់ខ្លួន។
ក្នុងរយៈពេលប៉ុន្មានសប្តាហ៍ថ្មីៗនេះពួកសកម្មប្រយុទ្ធដែលមានទំនាក់ទំនងជាមួយក្រុមAl Shabaabក៏បានវាយប្រហារគោលដៅនៅតាមព្រំដែនសូម៉ាលី-អេត្យូពី ដែលបង្កើនការព្រួយបារម្ភអំពីយុទ្ធសាស្ត្រថ្មី ចេញពីក្រុមនេះ។
ប្រភព៖ Reuters
