ប្រជាជនហៃទីរាប់ពាន់នាក់ ប្រមូលផ្ដុំគ្នាតវ៉ា ជុំវិញអសន្តិសុខ និងអតិផរណា
ប្រជាជនហៃទីរាប់ពាន់នាក់កាលពីថ្ងៃចន្ទ បានប្រមូលផ្ដុំគ្នាធ្វើបាតុកម្មទូទាំងប្រទេស តវ៉ាប្រឆាំងនឹងកំណើនអសន្តិសុខ និងតម្លៃទំនិញប្រើប្រាស់ដោយទាមទារឱ្យលោកនាយករដ្ឋមន្រ្តី Ariel Henry ចុះចេញពីដំណែង ខណៈធនាគារកណ្ដាលរបស់ប្រទេសសនិយាយថា អតិផរណាបានកើនឡើងដល់កម្រិតខ្ពស់បំផុតក្នុងរយៈពេល ១០ ឆ្នាំ។
បាតុករបានប្រមូលផ្ដុំគ្នានៅទីក្រុងមួយចំនួនរួមទាំងរដ្ឋធានីព័រអូប្រាំងដោយខ្លះនិយាយថា ពួកគេមានការខឹងសម្បារចំពោះការកើនឡើងនៃកង្វះប្រេងសាំង និងប្រេងម៉ាស៊ូតខណៈលោក Henry បរាជ័យក្នុងការបង្រ្កាបក្រុមអ្នកលេងដែលបង្កើនឧក្រិដ្ឋកម្ម តាមការសន្យារបស់លោក។
លោកJean Baden Dubois ទេសាភិបាលធនាគារកណ្តាលរបស់ហៃទីនិយាយថា សេដ្ឋកិច្ចប្រទេស ទំនងជានឹងធ្លាក់ចុះដល់ ០,៤ ភាគរយនៅឆ្នាំនេះ ខណៈអតិផរណានៅខែមិថុនាឡើងដល់ ២៩ ភាគរយ ដែលជាអត្រាខ្ពស់បំផុតក្នុងរយៈពេល១០ ឆ្នាំ។
ក្នុងប៉ុន្មានសប្តាហ៍ថ្មីៗ ប្រជាជនហៃទី បានជួបការលំបាកក្នុងការស្វែងរកប្រេងឥន្ធនៈ ដែលធ្វើឱ្យអ្នកខ្លះមិនអាចធ្វើការបាន។ ស្តុកឥន្ធនៈរបស់ប្រទេសមានកម្រិតទាប ខណៈដែលអ្នកនាំចូលប្រេងឥន្ធនៈហៃទី ជួបការលំបាកក្នុងការទទួលបានប្រាក់ឧបត្ថម្ភដែលរក្សាតម្លៃប្រេងឥន្ធនៈឱ្យនៅទាប។
ទន្ទឹមនឹងនោះ អំពើហិង្សា និងការចាប់ជំរិកនៅក្នុងប្រទស រួមទាំងក្នុងរដ្ឋធានីព័រអូប្រាំង ក្នុងរយៈពេលប៉ុន្មានខែថ្មីៗនេះ បានកើនឡើង ដោយក្រុមអ្នកលេងផ្សេងៗ បានសម្លាប់ជនស៊ីវិលរាប់រយនាក់នៅក្នុងការប្រយុទ្ធគ្នា។ ក្រុមទាំងនេះមានអំណាចកាន់តែខ្លាំង ចាប់តាំងពីការធ្វើឃាតប្រធានាធិបតីហៃទី លោកJovenelMoïseកាលពីខែកក្កដា ឆ្នាំមុន។
ប្រភព៖ Reuters
